मुंबई । प्रतिनिधी -
मुंबई महापालिकेच्या देवनार पशुवधगृहातील विविध प्रकारचे शुल्क वाढ करण्याचा निर्णय पालिकेने घेतला आहे. याचा परीणाम म्हणून मुंबईतील मटणाचे दर वाढणार आहे. आधीच मुंबईकर महागाईच्या कचाट्यात अडकले असताना आता मटणाची दरवाढ नागरिकांचा खिसा खाली करणार आहे. तसेच निर्यात शुल्क तिपटीने वाढवण्याचे प्रस्तावीत केले असल्याने परदेशात पाठवले जाणारे मांसही महागणार आहे. तसा शुल्क वाढीचा प्रस्ताव येत्या स्थायी समितीसमोर मंजुरी साठी सादर करण्यात आला आहे.
मुंबईकरांना ताजे व सकस मांस मिळावे म्हणून देवनार पशुवधगृहाची स्थापना करण्यात आली होती. पशुवधगृहातील लायसन्स ट्रांसफर, प्राण्याचे प्रवेश शुल्क, प्राण्याचे वध शुल्क, प्राण्याच्या गोठ्याचे भाडे, तसेच मांस वाहून नेण्यासाठी परिवहन शुल्क, निर्यात शुल्क, यांच्यात दरवाढ करण्यात येणार आहे. सन २००९ पासून या शुल्कात वाढ करण्यात आली नव्हती. गेल्या काही वर्षात महागाई वाढली आहे. पशुवधगृहातील विविध सामग्री, पाणी, विजेवरील खर्च वाढत चालला आहे. पशुवधगृहातील खर्च आणि उत्पनाचा ताळमेळ बसवणे प्रशासनाला अशक्य बनले असल्याने विविध शुल्कांमध्ये २५ ते २०० टक्क्यांपर्यंत वाढ प्रस्तावित केले आहे. या दरवाढीमुळे मुंबई महापालिकेला २ करोड ९०लाख २८ हजारांचे अतिरिक्त महसूल मिळेल अशी अपेक्षा प्रशासनाने व्यक्त केली आहे. दरम्यान, पालिका प्रशासनाने २०१४ मध्ये दरवाढ प्रस्तावित केली होती. मात्र पशुवधगृहात सुविधा नसल्यामुळे दरवाढ कशी करता येईल, असा प्रश्न स्थायी समितीत सदस्यांनी उपस्थित करत दरवाढीचा प्रस्ताव फेटाळला होता. पशुवधगृहात गेल्या दोन वर्षांत सुधारणा केल्या असल्याने पुन्हा एकदा दरवाढीचा प्रस्ताव स्थायी समितीच्या मंजुरीसाठी सादर करण्यात आला आहे. स्थायी समितीत या दरवाढीच्या प्रस्तावाला मंजुरी मिळाल्यानंतर पालिका महासभेत हा प्रस्ताव मंजुरीसाठी जाईल. महासभेत प्रस्ताव मंजूर झाल्यानंतर हि दरवाढ लागू करण्यात येईल.
अशी होणार दरवाढ
आताचा दर प्रस्तावित दर फरक टक्के दरवाढ
१ लायसेन्स हस्तांतरण १२०० १५०० ३०० २५ %
२ एंट्री फी
म्हैस १५ २० ५ ३३%
बैल १५ २० ५ ३३%
बकरे , शेळ्या , मेंढ्या ०७ ०९ २ २८ %
डुक्कर १० १३ ३ ३० %
डुक्कराचे पिल्लू ०५ ०६ १ २०%
३ गोठ्याचे दर
म्हैस १० { रोज } १३ ३ ३० %
बैल १० { रोज } १३ ३ ३० %
महापालिका च्या कर्मचाऱ्यांद्वारे वध केलेल्या प्राण्यांसाठी प्रस्तावित दर
म्हैस १२० १५० ३० २५ %
बैल १०० १२५ २५ २५ %
बकरे ३० ४० १० ३३ %
डुक्कर ५० ६५ १५ ३०%
डुक्कर पिल्लू ३० ४० १० ३० %
परवानाधारक आपल्या कामगारांकडून वध केलेल्या प्राण्यांसाठी प्रस्तावित दर
म्हैस ११५ १४५ ३० २६ %
बैल ९५ १२० २५ २६%
बकरे २० २५ ५ २५ %
डुक्कर ४५ ५५ १० २२ %
डुक्कर पिल्लू २५ ३० ०५ २० %
निर्यातीसाठी महापालिका कर्मचाऱ्यांकडून वध केलेल्या प्राण्यासाठी प्रस्तावित दर
म्हैस २०० ४५० २५० १५० %
बकरे ५० १५० १०० २०० %
डुक्कर ७० १९५ १२५ १७८ %
महापालिकेच्या मांसवाहिनीसाठी प्रस्तावित दर
शृंगी जानवर १०० १२५ २५ २५ %
देवनार पशुवधगृहात हातगाडी चालविण्यासाठी प्रस्तावित दर
१२५ १६० ३५ २८ %
