अतिवृष्टीनंतर २८ आरोग्य शिबिरांचा ३ हजार ६७८ नागरिकांनी घेतला लाभ

मुंबई । प्रतिनिधी -
बृहन्मुंबई महापालिका क्षेत्रात २९ ऑगस्ट २०१७ रोजी झालेल्या अतिवृष्टी दरम्यान अनेक नागरिकांना पावसाच्या पाण्यामधून चालावे लागले. मदत कार्य करणा-या महापालिकेच्या सुमारे ३० हजार कर्मचा-यांसह विविध स्वयंसेवी संस्थांचे कार्यकर्ते, नागरिक यांना देखील आवश्यकतेनुसार पावसाच्या पाण्यामधून चालावे लागले. अतिवृष्टी दरम्यान पावसाच्या पाण्याशी संबंध आलेल्या व्यक्तींना लेप्टोस्पायरोसिस होण्याची शक्यता असते. ही बाब लक्षात घेऊन प्रतिबंधात्मक उपचारांबाबतची माहिती महापालिकेच्या आरोग्य खात्याद्वारे प्रसिद्ध करण्यात आली आहे.

यादृष्टीने विविधस्तरीय प्रतिबंधात्मक उपाययोजनांचा भाग म्हणून महापालिकेच्या आरोग्य खात्याद्वारे दिनांक ३० व ३१ ऑगस्ट रोजी महापालिका क्षेत्रात आयोजित करण्यात आलेल्या २८ आरोग्य शिबिरांचा लाभ ३ हजार ६७८ नागरिकांनी घेतला आहे. तसेच महापालिकेच्या आरोग्य खात्याद्वारे प्रतिबंधात्मक आरोग्य सर्वेक्षणांतर्गत गृहभेटी सुरु करण्यात आल्या असून याद्वारे ३१ ऑगस्टपर्यंत ३६ हजार २०२ व्यक्तींवर प्रतिबंधात्मक औषधोपचार करण्यात आले आहेत, अशी माहिती महापालिकेच्या कार्यकारी आरोग्य अधिकारी डॉ. पद्मजा केसकर यांनी दिली आहे.

याबाबत अधिक माहिती देताना डॉ. केसकर यांनी सांगितले की, ज्या व्यक्ती पुराच्या पाण्यातून एकदाच चालल्या आहेत, त्या व्यक्ती 'कमी जोखीम' या गटात मोडतात. तर एकदाच पुराच्या पाण्यातून चाललेल्या पण अंगावर किंवा पायावर जखम असलेल्या किंवा चुकून पुराचे पाणी तोंडात गेलेल्या व्यक्ती या 'मध्यम जोखीम' या सदरात येतात.तसेच एकापेक्षा अधिकवेळा पुराच्या पाण्याशी संपर्क आल्यास अशा व्यक्ती 'अतिजोखीम' या गटात मोडतात. यामध्ये ८ वर्षापेक्षा कमी वयाची मुले आणि गरोदर महिला यांच्या बाबतीत अधिक खबरदारी घेणे गरजेचे असते. या बाबी लक्षात घेऊन महापालिकेने सर्वस्तरीय प्रतिबंधात्मक उपाययोजना हाती घेतल्या आहेत.

लेप्टोस्पायरोसिस हा रोग सूक्ष्मजंतुमुळे होतो -

उंदीर, कुत्रे, घोडे, म्हशी, बैल तसेच इतर काही प्राणी या रोगाचे स्रोत आहेतः बाधित प्राण्यांच्या लघवीद्वारे संसर्गित झालेल्या पाण्याशी संबंध येताच मनुष्याला लेप्टोस्पायरोसिस या रोगाची बाधा होऊ शकते.निरनिराळ्या प्रकारची जनावरे सदर सूक्ष्मजंतुचे वाहक असतात. पण त्यांच्यात सदर रोगाची लक्षणे दिसून येत नाहीत. शहरी विभागात लेप्टोस्पायरा हे सूक्ष्मजंतु उंदीर व कुत्रे यांच्यात आढळतात. संसर्गित जनावरांच्या मुत्राद्वारे दूषित झालेले पाणी, अन्न व माती यामार्फत मनुष्याला संसर्ग होतो. हा संसर्ग जखम झालेली त्वचा, डोळे, नाक याद्वारे होतो. पावसाळ्यात व पूर आल्यानंतर किंवा अतिवृष्टी झाल्यानंतर लोकांना दूषित पाण्यातून चालावे लागले तर शरीरावरील जखमांमधून या रोगाचे जंतू आपल्या शरीरात प्रवेश करु शकतात.

नागरिकांनी घ्यावयाची काळजी -

> पावसाळ्यात कोणताही ताप डेंग्यु, मलेरिया अथवा लेप्टोस्पायरोसिस असू शकतो. त्यामुळे तापाकडे दुर्लक्ष न करता त्वरीत डॉक्टरांचा सल्ला घेणे आवश्यक आहे.
> पायावर जखम असल्यास साचलेल्या पाण्यातून ये-जा करणे टाळावे किंवा गमबुटाचा वापर करावा.
> साचलेल्या पाण्यातून चालून आल्यावर पाय साबणाने स्वच्छ धुवून कोरडे करावे.
> साचलेल्या पाण्यातून चालल्यामुळे लेप्टोस्पायरोसिस संसर्ग होण्याची शक्यता असते त्यामुळे डॉक्टरांच्या सल्ल्यानुसार लेप्टोस्पायरोसिस प्रतिबंधात्मक उपचार तातडीने घेणे आवश्यक आहे.
> ताप आल्यास त्वरीत डॉक्टरांचा सल्ला घ्या.
> पुरेशी विश्रांती, पोषक आहार व वेळेत उपचार घ्यावा.
> उंदीर- घुशींचा नायनाट करावा.
> उंदीर नियंत्रणासाठी उंदराला अन्न मिळवून न देणे, उंदराचे सापळे रचणे, त्याला विष घालणे इत्यादी मार्ग वापरात आणावे.
> घरात व आजुबाजूला कचरा साठणार नाही याची दक्षता घ्यावी व कच-याची विल्हेवाट लावावी.
> ट्रेकींग, एडवेंचर स्पोर्टस खेळाचे प्रकार टाळावे.