शरद पवारांनी यापूर्वी नोटाबंदीच्या निर्णयाला पाठिंबा दिला होता. यामुळे पवार काय बोलतात याकडे सर्वांचे लक्ष लागले होते. दिवंगत इंदिरा गांधी यांनी देशात आणीबाणी आणली होती. तेव्हाही देशाचे कल्याण होणार, गुन्हेगारी, गरिबी दूर होणार असे सांगण्यात आले होते. तसेच चलनबंदीबाबत सांगण्यात येत आहे. सुरुवातीला बरे वाटले आता मात्र त्यातील भानगड लक्षात येत आहे. नववनीन घोषणेने सामान्य माणसाला गोंधळली आहे. ही आर्थिक आणीबाणी आहे. आणीबाणीनंतरच्या निवडणुकीत इंदिरा गांधीचा साफ धुव्वा उडाला होता. तशीच वेळ मोदींवर येणार असल्याचे पवार यावेळी म्हणाले.
मुंबई लोकलवर आठ हजार कोटी खर्च केले तर मुंबईकरांचे प्रश्न सुटतील, परंतु ९८ हजार कोटी खर्च करून त्यांना बुलेट ट्रेनने अहमदाबादला जायची घाई लागली आहे, अशी टीका पवार यांनी केली. त्यामुळे मुंबई महापालिकेत परिवर्तन आवश्यक असल्याचे पवारांनी सांगितले. ८६ टक्के नोटा चलनातून रद्द करण्याचा निर्णय घेतला गेला. हा देश कष्टकऱ्यांचा, मजुरांचा, कामगारांचा आहे, हे आपल्याला पुन्हा सिद्ध करावे लागेल. त्यामुळे आता सत्ताधारी मत मागायला जातील, तेव्हा काळ्या पैशांच्या विषयावर जनता त्यांना धडा शिकवेल, असेही पवार म्हणाले. तत्पूर्वी माजी केंद्रीय मंत्री खासदार प्रफुल्ल पटेल, आ. जयंत पाटील आणि पक्षाचे मुंबई अध्यक्ष सचिन अहिर आदी नेत्यांची भाषणे झाली.
