राज्यातील शहरी भागामध्ये नोकरी-व्यवसायासाठी प्रवास करणाऱ्या महिलांची वाढती संख्या आणि अपुऱ्या बसेसच्या फेऱ्यांमुळे होणाऱ्या त्रासापासून त्यांची सुटका करण्याच्या उद्देशाने राज्यातील पाच महानगरपालिका क्षेत्रांमध्ये खास महिला प्रवाशांसाठी तेजस्विनी बस सेवा सुरु करण्यास आज मंत्रिमडळाच्या बैठकीत मान्यता देण्यात आली.
महिला सुरक्षिततेबाबत राज्याचे प्राधान्य लक्षात घेऊन मुंबई, नवी मुंबई, ठाणे, कल्याण-डोंबिवली आणि नागपूर या महानगरपालिका क्षेत्रामध्ये सार्वजनिक बस वाहतुकीच्या माध्यमातून महिलांसाठी 300 तेजस्विनी बसेस शासनातर्फे देण्याचा निर्णय घेण्यात आला.
राज्यामध्ये सध्या 27 महानगरपालिका असून यापैकी काही महानगरपालिकांची स्वत:ची वाहतूक व्यवस्था आहे. परंतु अपुऱ्या बसेसच्या फेऱ्या आणि वेगाने वाढणारी नागरी भागातील लोकसंख्या यामुळे नोकरी व्यवसायासाठी जाणाऱ्या महिला प्रवाशांना गर्दीचा सामना करावा लागतो. कित्येकदा रांगेत ताटकळत उभे रहावे लागते हे लक्षात घेऊन2016-17 च्या अर्थसंकल्पात महानगरपालिका क्षेत्रामध्ये तेजस्विनी बस या नावाने महिलांसाठी स्वतंत्र बस सुरु करण्याची घोषणा राज्य सरकारतर्फे करण्यात आली होती.
या घोषणेची पूर्तता करण्याच्या उद्देशाने सार्वजनिक बस वाहतूक व्यवस्थेच्या माध्यमातून महिलांसाठी 300 तेजस्विनी बसेस शासनातर्फे देण्यात येणार असून त्यासाठी 2016-17 या आर्थिक वर्षासाठी 50 कोटी रुपये देण्यात येणार आहेत. या योजनेंतर्गत 300 बसेस खरेदी करण्यासाठी अंदाजे 90 कोटी रुपये इतका खर्च अपेक्षित आहे. यासाठी शासन स्तरावरुन 100 टक्के निधी उपलब्ध करुन देण्यात येणार आहे.
या योजनेंर्तगत सकाळी 7 ते 11 तसेच सायंकाळी 5 ते रात्री 9 या कालावधीत सुटणाऱ्या बसेसमधील 100 टक्के आसने महिलांसाठी आरक्षित असतील. तसेच या बसेससाठी तिकीटाचे दर संबंधित महानगरपालिका क्षेत्रातील प्रचलित तिकीट दरानुसार असतील. तथापि तिकीटाचे दर, आसन व्यवस्था, बसेसच्या वेळा यामध्ये स्थानिक परिस्थितीनुसार बदल करण्याचे अधिकार संबंधित महानगरपालिकेला असतील. या योजनेंतर्गत खरेदी करण्यात येणाऱ्या बसेस पर्यावरणपूरक असणे बंधनकारक करण्यात आले आहे. तसेच या बसेसमध्ये सीसीटीव्ही कॅमेरे, टीव्ही, सार्वजनिक उद्घोषणा यंत्रणा बसविणे अनिवार्य आहे. महाराष्ट्र शासन तेजस्विनी बस असा उल्लेख असलेल्या या बसेसमध्ये प्रामुख्याने महिला चालक व वाहकांच्या सेवा देण्यात येतील.
