परिमंडळ १ मधील डी विभागांतर्गत येणा-या 'लेडी लक्ष्मीबाई जगमोहनदास मार्ग' (Nepean Sea Road) येथील 'प्रियदर्शनी पार्क'येथे जलतरण तलाव प्रस्तावित करण्यात येत आहे. परिमंडळ २ मधील जी / दक्षिण विभागांतर्गत येणा-या व जलअभियंता विभागाच्या अखत्यारित असणा-या 'वरळी हिल रिझर्व्हॉयर' (Worli Hill Reservoir)येथे जलतरण तलाव प्रस्तावित करण्यात येत आहे. परिमंडळ ३ मधील के पूर्व विभागातील एका भूखंडावर जलतरण तलाव प्रस्तावित करण्यात येत आहे. परिमंडळ ४ मधील पी उत्तर विभाग कार्यालया जवळ असणा-या चाचा नेहरु मैदान परिसरात जलतरण तलाव प्रस्तावित करण्यात येत आहे. परिमंडळ ५ मधील एम पूर्व विभागांतर्गत येणा-या देवनार गावामध्ये (Village Deonar) एका मनोरंजन मैदानाच्या परिसरात जलतरण तलाव प्रस्तावित करण्यात येत आहे. परिमंडळ ६ मधील एस विभागांतर्गत येणा-या विक्रोळी पूर्व परिसरातील टागोर नगर मधील राजर्षी शाहू क्रीडांगणाच्या परिसरात जलतरण तलाव प्रस्तावित करण्यात येत आहे. परिमंडळ ७ मधील आर उत्तर विभागांतर्गत येणा-या दहिसर पश्चिम परिसरातील आर.टी.ओ. कार्यालयाजवळील भूखंडावर जलतरण तलाव प्रस्तावित करण्यात येत आहे.
बृहन्मुंबई महापालिका क्षेत्रात सध्या ७ जलतरण तलाव आहेत. यामध्ये दादर (जी उत्तर विभाग) परिसरातील महात्मा गांधी स्मारक ऑलिंपिक जलतरण तलाव, घाटकोपर (एन विभाग) परिसरातील महापालिका जलतरण तलाव, चेंबूर (एम पूर्व विभाग) परिसरातील जनरल अरुणकुमार वैद्य जलतरण तलाव, कांदिवली (आर दक्षिण विभाग) परिसरातील सरदार वल्लभभाई पटेल जलतरण तलाव, दहिसर (आर उत्तर विभाग)परिसरातील श्री मूरबाळीदेवी जलतरण तलाव यांचा समावेश आहे. यापैकी चेंबूर व कांदिवली येथील तलावांचे सध्या नूतनीकरण सुरु आहे. त्याचबरोबर मुलुंड (टी विभाग) परिसरातील प्रियदर्शनी इंदिरा गांधी क्रीडा संकुल आणि अंधेरी पश्चिम (के पश्चिम विभाग) परिसरातील शहाजीराजे क्रीडा संकुल येथे देखील महापालिकेचे प्रत्येकी एक याप्रमाणे दोन जलतरण तलाव आहेत. या दोन्ही तरण तलावांचे देखभाल व व्यवस्थापन बृहन्मुंबई क्रीडा आणि ललितकला प्रतिष्ठान यांच्यामार्फत केले जाते. या सर्व सात जलतरण तलावांचा लाभ मुंबईकर नागरिक मोठ्या प्रमाणात घेत असतात.
