घरातील बदलाबाबतची परवानगी प्रक्रिया अधिक सुलभ

मुंबई / प्रतिनिधी 8 Aug 2016 - बृहन्मुंबई महापालिका क्षेत्रात वाढलेल्या कुटुंबामुळे किंवा तत्सम कारणामुळे असलेल्या घरात काही बदल करण्याची गरज काळानुरुप निर्माण होते. हे बदल सहजपणे करता यावे, त्यात अडचणी येऊ नये यासाठी आता महापालिकेच्या स्तरावर अनेक सकारात्मक सुधारणा करण्यात आल्या आहेत. या सुधारणांमध्ये 'मुंबई महापालिका अधिनियम'कलम ३४२ नुसार अंतर्गत-रचना बदलांबाबतच्या किरकोळ स्वरुपाच्या प्रस्तावांबाबत (Miscellaneous Proposals) परवानग्या ऑनलाईन पद्धतीने देण्याचे प्रस्तावित करण्यात आले आहे. 

किरकोळ स्वरुपाच्या प्रस्तावांमध्ये जागांचे एकत्रीकरण करणे, दरवाजे काढणे, खिडक्यांचा आकार मोठा करणे, कार्यालयात केबिन तयार करणे, किचनमधील ओट्याची जागा बदलणे इत्यादी बाबींचा समावेश होतो. या प्रकारच्या परवानगी प्रक्रियांसाठी यापूर्वी सुटसुटीत पद्धत नव्हती, त्यामुळे नागरिकांची गैरसोय होत होती. मात्र आता या सर्व प्रक्रिया ऑनलाईन केल्यावर संबंधित परवानगी त्वरित मिळणे शक्य होणार आहे. या सुलभीकरणाच्या प्रस्तावाला महापालिका आयुक्त अजोय मेहता यांनी आज मंजूरी दिली आहे.

तसेच मुंबई महापालिका अधिनियम कलम ३४२ नुसार इमारतीच्या अंतर्गत स्तरावरील 'टेनंटेबल रिपेअर्स' साठी परवानगीची गरज नसते. या बाबींमध्ये इमारतींच्या आरसीसी बाबींचे मजबूतीकरण करण्यासाठी गनायटींग करणे, प्लास्टरींग करणे, रंगकाम करणे, फरश्या बदलणे,संडासाचे भांडे बदलणे, विद्युत विषयक दुरुस्ती करणे आदी बाबींचा समावेश पूर्वीपासूनच आहे. यामध्ये आता महापालिकेच्या सुधारित धोरणानुसार 'उघडता येईल असा घराचा सुरक्षा दरवाजा' (सेफ्टी डोअर)आणि 'खिडक्यांच्या जाळी' (ग्रील) यांचा समावेश करण्यात आला आहे.यामुळे आता घराला सेफ्टी डोअर बसविणे, खिडक्यांना जाळी बसविणे या बाबींसाठी महापालिकेची परवानगी घेण्याची गरज असणार नाही. तथापि,खिडक्यांना बसविण्याची जाळी ही आवश्यकतेनुसार सहजपणे उघडता येईल अशा प्रकारची असणे बंधनकारक असणार आहे.

मुंबई महापालिका अधिनियम कलम ३४२ नुसार अंतर्गत-रचना बदलांबाबतच्या किरकोळ स्वरुपाच्या प्रस्तावांबाबत (Miscellaneous Proposals) ऑनलाईन प्रस्ताव सादर करताना त्यासोबत अर्जदाराचे घोषणापत्र (Declaration) असणे आवश्यक असणार आहे. तसेच सदर ऑनलाईन प्रस्ताव हा नोंदणीकृत वास्तुविशारद (Registered Architect) वा अनुज्ञप्तीधारक सर्वेक्षक (License Surveyor) यांचे स्वयंप्रमाणिकरण ऑनलाईन पद्धतीने सादर करणे बंधनकारक असणार आहे. सध्या ही प्रक्रिया ऑफलाईन पद्धतीने राबविण्यास सुरुवात करण्यात येत असून लवकरच ही प्रक्रिया ऑनलाईन करण्यात येणार आहे.

ज्या इमारतींना भोगवटा प्रमाणपत्र देण्यात आलेले आहे किंवा इमारत पूर्णत्त्वाचा दाखला देण्यात आलेला आहे किंवा ज्या इमारतींचा 'Tolerated Category' मध्ये समावेश आहे, अशा इमारतींमध्ये परवानग्या ऑनलाईन देण्याचे प्रस्तावित करण्यात आले आहे. 

त्यामध्ये खालील बाबींचा प्रामुख्याने समावेश आहे:

• घर / सदनिका, दुकान, कार्यालये, औद्यागिक जागा इत्यादींबाबत इमारतीच्या मूळ बांधकामाला धक्का लागणार नाही; या पद्धतीने अंतर्गत भिंत हटविणे, अंतर्गत दरवाजे काढणे,खिडकीचा आकार मोठा करणे इत्यादी
• विकास नियंत्रण नियमावली तसेच संबंधित नियमांच्या अधीन राहून सदनिका / घर / दुकान / औद्योगिक जागा इत्यादींमधील खोल्या एकत्र करणे किंवा त्यातील अंतर्गत सुधारणा करणे(Alteration and Amalgamation of House / Flats / Shops / Offices / Industrial Units / Premises etc)
• विकास नियंत्रण नियमावलीच्या अधीन राहून कार्यालयातील केबीन तयार करणे
• किचन मधील ओट्याची जागा बदलविणे किंवा त्याची उंची कमी जास्त करणे, मात्र हे करताना सांडपाणी व्यवस्थेमध्ये(Plumbing Outlet) कोणताही बदल होणार नाही याची खबरदारी घेणे
• सांडपाणी व मलनिःसारण व्यवस्थेमध्ये कोणताही बदल होणार नाही याची काळजी घेत 'बाथरुम, टॉयलेट ब्लॉक' मध्ये यथोचित बदल करणे
• 'विकास नियंत्रण नियमावली' तसेच संबंधित तरतूदींच्या अधिन राहून किचन, औद्योगिक जागा, दुकान इत्यादी ठिकाणी विशिष्ट उंचीचा व विशिष्ट आकाराचा लॉफ्ट बांधणे
• या अंतर्गत सादर करण्यात येणारे प्रस्ताव नोंदणीकृत वास्तुविशारद (Registered Architect) वा अनुज्ञप्तीधारक सर्वेक्षक (License Surveyor) यांचेद्वारे सादर करावयाचे आहे
• सदर प्रस्तावासह वास्तूरचनाकार वा अनुज्ञप्तीधारक सर्वेक्षक यांचे स्वयंप्रमाणिकरण तसेच अर्जदाराचे घोषणापत्र ऑनलाईन पद्धतीने सादर करणे बंधनकारक असणार आहे
• परवानगी प्रक्रियेबाबत आवश्यक ते शुल्क ऑनलाईन स्वरुपात भरण्याची सुविधा देखील उपलब्ध करुन देण्यात येणार आहे.