मुंबई महापालिकेकडून २५९६ उपहारगृहांची तपासणी - १९३६ अनधिकृत सिलेंडर्स जप्त

मुंबई / प्रतिनिधी - महापालिकेद्वारे दि. १९ ऑक्टोबर ते ५ नोव्हेंबर दरम्यान करण्यात आलेल्या उपहारगृहांच्या तपासणीमध्ये आजपर्यंत २५९६ उपहारगृहांची तपासणी करण्यात आली आहे. या तपासणी दरम्यान १,९३६ अनधिकृत सिलेंडर्स महापालिकेच्या विशेष चमूद्वारे जप्त करण्यात आले आहेत. तर २,१३३ उपहारगृहांबाबत महापालिकेच्या नियम व पध्दतींनुसार यथोचित कार्यवाही करण्यात येत आहे.

दि. १६ ऑक्टोबर २०१५ रोजी कुर्ला परिसरातील एका उपहारगृहात झालेल्या दुर्दैवी घटनेनंतर महापालिका क्षेत्रातील सर्व उपहारगृहांची तपासणी महापालिकेद्वारे करण्यात येत आहे. या तपासणीसाठी व योग्य त्या कारवाईसाठी महापालिकेच्या सर्व २४ विभागात प्रत्येक विभागस्तरावर एका विशेष चमूचे गठन करण्यात आले होते. सदर चमूद्वारे सर्व विभागांमध्ये उपहारगृहांच्या तपासण्या करण्यात येत आहेत.

महापालिका क्षेत्रातील अनेक उपहारगृहांमध्ये त्यांच्या मर्यादेपेक्षा अधिक सिलेंडर्स अनधिकृतरित्या ठेवण्यात आल्याचे आढळून आले आहे. हे सर्व अनधिकृत सिलेंडर्स महापालिकेद्वारे जप्त करण्यात आले आहेत. तसेच उपहारगृहांमध्ये आढळून आलेले अनधिकृत बांधकाम, अनधिकृत शेड इत्यादी हटविण्यात आले असून अग्निसुरक्षा विषयक बाबींची देखील तपासणी करण्यात येत आहे.याबाबत उपलब्ध झालेल्या आकडेवारीनुसार महापालिकेच्या आर / दक्षिण विभागात सर्वाधिक म्हणजे १५० उपहारगृहांबाबत महापालिकेच्या नियम व पध्दतीनुसार कार्यवाही करण्यात येत आहे.तर सर्वाधिक म्हणजे १८७ सिलेंडर्स हे पी/उत्तर विभागाच्या परिसरातून जप्त करण्यात आले आहेत.

ज्या उपहारगृहातील अग्निसुरक्षा परिपूर्ण असेल त्या सर्व उपहारगृहांच्या प्रवेशद्वारांवर ''हा परिसर अग्निसुरक्षिततेच्या दृष्टीने परिपूर्ण आहे'' (THIS RESTAURANT IS FIRE SAFETY COMPLIANT) असा संदेश असलेला व किमान ७५ मीमी पेक्षा अधिक आकाराच्या अक्षरात असलेला फलक ठळकपणे लावण्याच्या सूचना देण्यात आल्या आहेत. त्याचबरोबर नागरिकांनी खाद्यपदार्थांचा आस्वाद घेण्यासाठी उपहारगृहात जातांना अग्निसुरक्षा विषयक फलक असलेल्या उपहारगृहाला भेट द्यावी, असे आवाहन अग्निशमन दलाद्वारे करण्यात आले आहे.

महापालिकाक्षेत्रातील प्रत्येक उपहारगृहातील आकारमानानुसार व संबंधित बाबींच्या सापेक्ष त्या उपहारगृहात किती 'गॅस सिलेंडर' असावेत व कशाप्रकारे ठेवले जावेत, तसेच उपहारगृहामध्ये परिपूर्ण अग्निसुरक्षा कशी असावी, याबाबत जारी करण्यात आलेल्या सुधारीत मार्गदर्शक सूचना महापालिकेच्या www.mcgm.gov.in या संकेतस्थळावर उपलब्ध करुन देण्यात येत असून सर्व संबंधितांनी सदर मार्गदर्शक सूचनांचे परिपूर्णपणे पालन करावे, असेही आवाहन मुंबई अग्निशमन दलाद्वारे करण्यात आले आहे.

विभागनिहाय आकडेवारी :

अनु. क्र.	परिमंडळ	विभाग	उपहारगृहांची केलेली तपासणी	कार्यवाही / कारवाई केलेल्या उपहारगृहांची संख्या	कार्यवाही  सुरु केल्यापासून जप्त केलेल्या सिलेंडर्सची संख्या
1	एक	ए	105	77	39
2	एक	बी	94	79	63
3	एक	सी	110	70	32
4	एक	डी	131	65	60
5	एक	इ	142	132	124
6	दोन	एफ /दक्षिण	90	90	78
7	दोन	एफ /उत्तर	64	43	51
8	दोन	जी /दक्षिण	122	75	84
9	दोन	जी /उत्तर	148	148	54
10	तीन	एच / पूर्व	83	50	87
11	तीन	एच /पश्चिम	145	110	24
12	तीन	के / पूर्व	81	81	96
13	चार	के /पश्चिम	95	71	96
14	चार	पी /दक्षिण	84	84	144
15	चार	पी / उत्तर	71	61	187
16	पाच	एल	125	107	111
17	पाच	एम / पूर्व	132	91	22
18	पाच	एम /पश्चिम	49	49	55
19	सहा	एन	92	85	67
20	सहा	एस	115	79	46
21	सहा	टी	97	82	21
22	सात	आर /दक्षिण	157	150	150
23	सात	आर /मध्य	125	125	115
24	सात	आर /उत्तर	139	129	130
		एकूण	2596	2133	1936