महिलांसाठी सार्वजनिक व सामुदायिक स्वच्छता गृहांची संख्या वाढावी, तसेच असणारी स्वच्छता-गृहे अधिकाधिक गुणवत्तापूर्ण,स्वच्छ, चांगली व सुरक्षित असावीत; यासाठी आवश्यक ते सर्व सहकार्य करून पाठपुरावा करणार असल्याचे प्रतिपादन मुंबईच्या महापौर स्नेहल आंबेकर यांनी केले. बृहन्मुंबई महापालिकेच्या नायर दंत महाविद्यालयाच्या सभागृहात महापालिका, ऑब्जर्व्हर रिसर्च फाउंडेशन व 'राईट टू पी' च्या संयुक्त विद्यमाने आयोजित एका कार्यक्रमात बोलत होत्या.
याप्रसंगी महापालिकेच्या कार्यकारी आरोग्य अधिकारी डॉ. पद्मजा केसकर, प्रमुख कामगार अधिकारी शुभदा कामते, समाजसेविका ज्योतीताई म्हापसेकर, सावित्रीबाई स्त्री संसाधन केंद्राच्या सचिव व रा.ए.स्मा. रुग्णालयातील प्रा. डॉ. कामाक्षी भाटे, नायर दंत महाविद्यालयाच्या अधिष्ठात्री (प्र.) डॉ. दीक्षित आणि ऑब्जर्व्हर रिसर्च फाउंडेशन चे अध्यक्ष डॉ. सुधींद्र कुलकर्णी यांच्यासह मोठ्या संख्येने मान्यवर व कार्यकर्ते उपस्थित होते.
या कार्यक्रमादरम्यान महापौर स्नेहल आंबेकर यांच्या हस्ते 'टॉयलेट टॉर्चर' ह्या पुस्तकाचे प्रकाशन करण्यात आले. कार्यक्रमादरम्यान विविध मान्यवरांनी, कार्यकर्त्यांनी आपली मनोगते मांडली. तसेच विषयानुरूप संगणकीय सादरीकरणासह पथनाट्य व गाण्यांचे सादरीकरण देखील कार्यक्रमादरम्यान करण्यात आले.
