९ एप्रिलला धारावी बंद

मुंबई- ४०० चौरस फुटांच्या घराच्या मागणीसाठी धारावीकरांनी आता आंदोलन तीव्र केले असून ९ एप्रिलला धारावी बंदची हाक दिली आहे. धारावी बचाव आंदोलनाच्या माध्यमातून धारावीकरांनी उत्स्फूर्तपणे धारावी बंदमध्ये सहभागी होण्याचा निर्णय घेतला आहे.

धारावी पुनर्विकासाअंतर्गत ३०० चौरस फुटांचे घर देण्यात येणार असून धारावीकरांकडून ४०० चौरस फुटांच्या घराची मागणी होत आहे. मात्र या मागणीकडे दडपशाहीचा वापर करीत धारावी पुनर्विकास प्रकल्प मार्गी लावण्याचा राज्य सरकारचा डाव आहे. मात्र हा डाव हाणून पाडीत ४०० चौरस फुटांचे घर मिळविण्यासाठी धारावी बचाव आंदोलनाअंतर्गत सर्वपक्षीय नेत्यांनी गेल्या महिनाभरापासून आंदोलन तीव्र केले आहे. त्याचाच भाग म्हणून सोमवार, २५ मार्चला धारावीत कार्यकर्त्यांची जाहीर सभा आयोजित केली होती. या सभेत ‘धारावी बंद’ची हाक देण्यात आली. धारावीकर या बंदमध्ये सहभागी होणार असून सायंकाळी ४ वाजता संत रोहिदास मार्ग येथे जाहीर सभा होणार आहे.